Екі адамға жеткен ас, үш адамға да жетеді

Қыркүйек 6, 2008 in Пайдалы деректер, Хадистер

Садақа жайлы хадистер

«Беруші қол алушы қолға қарағанда артығырақ. Беретін болсаң, алдымен өз отбасыңнан бастап бер. Садақаның абзалы – дәулетінен жомарттықпен бергені. Аллаһ Тағала өзгелерге қол созуды қаламаған пендені тіленуден сақтайды, ал барына қанағат еткен пенденің барлық қажетін өтейді». (Бұхари, Муслим)

***

«Үстіңгі (беруші) қол төменгі (ашушы) қолдан артық. Өйткені үстіңгі қол – жұмсаушы, ал астыңғы қол – сұраушы». (Бұхари, Муслим)

***

«Жоқшылыққа тап болған кезде қажетін адамдардан сұарған пенде ешқашан жоқшылықтан құтыла алмайды. Ал енді, қажетін Аллаһ Тағаладан тілеген пендесіне Аллаһ ерте ме, кеш пе, тиісті ризығын береді». (Тирмизи, Әбу Дәуд)

***

«Кім маған адамдардан өзіне қажетсіз бір нәрсені сұрамаймын деп уәде етсе, мен оның жәннатқа кіруіне кепілдік беремін». (Әбу Дәуд)

***

«Расында, сендердің араларыңнан біреудің қолына арқан алып, таудан бір құшақ отын әкеп сатқаны, адамдардан қажетін сұраған кісіден абзал. Әрі осы себепті Аллаһ Тағала оны жоқшылықтан сақтайды». (Бұхари)

***

«Ешбір пенде өз маңдай терімен тапқан нәпақасынан абзал ас ішіп көрмеген. Аллаһ Тағаланың пайғамбары болған Дәудтің (ғ.с.) өзі күнкөрісін өз еңбегімен табатын еді». (Бұхари)

***

«Дәуд пайғамбар (ғ.с.) тек өз кәсібімен тапқан нәрсесін азық ететін». (Бұхари)

***

«Аллаһ жолына жұмсағаны – кісінің өз малы. Ал одан артылғаны – (соңындағы) мирасқорлардың малы». (Бұхари)

***

«Құрманың жартысымен болса да өздеріңді тозақ отынан аман алып қалыңдар. Оны да таппаған адам ең болмаса жақсы сөз айтсын». (Бұхари, Муслим)

***

«Адамдар Аллаһтың елшісінен (с.ғ.с.) не нәрсе сұраса да ол (с.ғ.с.) ешқашан: «Жоқ» деп айтпайтын еді». (Бұхари, Муслим)

***

«Әр күні пенделер ұйқысынан оянған уақытта аспаннан екі періште түсіп, оның бірі: «Уа, Тәңірім! Мал-мүлкін жақсылыққа жұмсаушының жұмсағанын есесімен қайтар» десе, екіншісі: «Уа, Тәңірім! Сараңдық қылған кісіні шығынға ұшырат» деп тілейді». (Бұхари, Муслим)

***

«Ей, адам баласы! Дүние-мүлкіңді жақсылыққа жұмса, сонда саған да жұмсалады». (Бұхари, Муслим)

***

«Бір кісі Аллаһтың елшісінен (с.ғ.с.): «Исламдағы ең жақсы амал қандай?» деп сұрады. Расулулла (с.ғ.с.): «Мұқтаж адамды тамақтандыруың…» деп жауап берді». (Бұхари, Муслим)

***

«Қырық түрлі ізгі амал бар. Оның ең абзалы – мұқтаж болған кісіге өзінің сауын ешкісін беру». (Бұхари)

***

«Ей, адам баласы! Сен үшін тіршілігіңе қажетінен артығын ұстап қалғаныңнан көрі оны жұмсағаның абзалырақ. Қолыңдағыны жарататын болсаң, ең алдымен өз отбасыңнан баста. Әрі білгін, беруші қол алушы қолдан артық». (Тирмизи)

***

«Садақа пенденің малын кемітпейді. Ал тіленушіліктің есігін ашқан пендеге Аллаһ Тағала жоқшылықтың есігін ашады» (Тирмизи)

***

«Пайғамбарымыздың (с.ғ.с.) отбасы қой сойып, етін мұқтаждарға таратты. Таратып болған соң: «Еттен бірдеңе қалды ма?» деп сұрады. Айша анамыз (р.ғ.): «Қол етінен басқа еш нәрсесі қалмады» деп жауап берді. Сол кезде Пайғамбарымыз (с.ғ.с.): «Бізге осы қол етінен басқасының бәрі бұйырған екен» деді». (Тирмизи)

***

«Аллаһ Тағала тек адал еңбекпен тапқан дүниеден берілген садақаны қабыл етеді. Кімде-кім адал еңбек етіп, тапқанынан жарты құрманың құнындай нәрсе болса да садақа етсе, Аллаһ Тағала оны қабыл етіп, көлемін (яғни сауабын) таудай етіп өсіреді» (Бұхари, Муслим)

***

«Екі адамға жеткен ас, үш адамға да жетеді. Үш адамға жеткен ас төрт адамға да жетеді». (Бұхари, Муслим)